e di që arti i parapriu jetës

dhe që luftën parapëlqen ta bësh nga largdistanca

përmes armëve që strehon mes vargjeve

e pas vijave frontale

 

e di që yjet urrejnë të biejë me shpejtësi

dhe që kasapi i mirë

kafshës kurrë s’u shfaqë thikën

e di

e di dhe që Zoti

komunikoi me krijesën e vet

zbriti

ofroi shpëtimin

ngjitjen lart

 

lëshohu dhe ti poet

me lëshimin e yjve që vrasin djajt

lëri nëntekstet

robotët e këtij fillimshekulli janë analfabet

 

poet

shkencëtarëve që ligje kërkojnë

filozofëve që vuajnë për principe

pseudointelektualëve

dhe të gjithve që përjashtimet dashurojnë

në këtë kohë lakuriqe

sillu ashtu siç është thënë

sipas vendit kuvedi

 

lësho

porosinë lakuriqe

lësho

 

bota

ajo dikur ekzistoi dhe në rehati jetoi

pa ju

thjesht

pa ju

(Nga përmbledhja “NJË MINUTË HESHTJE”, botuar në vitin 2003)

Advertisements